ပြည်သူခိုင်းလို့ကောင်းသည့် နွားကြီးမှန်းသိအောင် ကြိုးစားမည်ဟု ကြံ့ခိုင်ရေးပါတီ ပြော

ရွေးကောက်ပွဲတွေမှာ အောင်နိုင်ဖို့အတွက် ပါတီကို ခိုင်းလို့ကောင်းတဲ့ နွားကြီးမှန်း သိအောင် ကြိုးစားသွားမယ်လို့ ပြည်ထောင်စုကြံ့ခိုင်ရေးနှင့် ဖွံ့ဖြိုးတိုးတက်ရေးပါတီရဲ့ ပြောရေးဆိုခွင့်ရှိသူ ဒေါက်တာ နန္ဒလှမြင့်က ပြောပါတယ်။

“နိုင်ငံရေးပါတီတခုအနေနဲ့ အန္တိမ ရည်မှန်းချက်ကတော့ အနီးစပ်ဆုံး ရွေးကောက်ပွဲ တွေမှာ အနိုင်ရရှိရေးပဲဖြစ်တယ်။ အနိုင်ရရှိရေးကလည်း ကျနော်တို့ မဲဆန္ဒရှင်ပြည်သူတွေက မဲပေးရွေးချယ်မှ ကျနော်တို့က လုပ်လို့ရမှာ၊ ကျနော်တို့ အနိုင်ရရှိရေးအတွက်ကိုတော့ ပြည်သူ ယုံကြည်လာအောင် ပြည်သူအားကိုးလာအောင် ပြည်သူတွေက သူတို့ခိုင်းလို့ကောင်းတဲ့ နွားကြီး မှန်းသိအောင် ကျနော်တို့က ကြိုးစားပြရမှာပေါ့။ မဲပေးခြင်းက ပြည်သူတွေနဲ့ပဲဆိုင်တယ်။ ကျနော်တို့ အကောင်းဆုံးကြိုးစားမယ် ဘယ်လိုလုပ်သွားမလဲ ဆိုတာကတော့ ပါတီ လုပ်ငန်းစဉ်ဖြစ်တဲ့ အတွက် မရှင်းပြလိုဘူး”လို့ ဒေါက်တာနန္ဒလှမြင့်က ပြောပါတယ်။

ဒါ့အပြင် ပြည်သူတွေအနေနဲ့လည်း ဖြစ်စေချင်တဲ့သူကိုသာ မဲပေးဖို့အတွက်ကိုလည်း ဒေါက်တာနန္ဒလှမြင့်က တိုက်တွန်းပြောပါတယ်။ဇွန်လ ၅ ရက်က နေပြည်တော် ရတနာသိင်္ဃဟိုတယ်မှာ ကျင်းပခဲ့တဲ့ ကြံ့ခိုင်ရေးပါတီရဲ့ သတင်းစာရှင်းလင်းပွဲမှာ ပြောဆိုခဲ့တာဖြစ်ပြီး ရွေးကောက်ပွဲကော်မရှင်ဟာ ဘက်လိုက်မှုတွေ ရှိနေတယ်လို့လည်း ပါတီပြောခွင့်သူက စွပ်စွဲပြောဆိုသွားပါတယ်။

Tips News